Финалның хәлиткеч алышында Азат үзенең бик көчле һәм сыналган көндәше Эльдар Хәмитовны җиңеп, хәрәкәтләренең төгәллеген һәм келәмдә чын лидер икәнен тагын бер кат исбатлады.

Мәйдан батырына — лаеклы бүләк

Традиция буенча, Чаллы шәһәре җитәкчелеге исеменнән бәйрәмнең абсолют батырына зур бүләкләр тапшырылды. Бу юлы Азат Габдрәшитовка өр-яңа LADA Vesta автомобиле ачкычлары һәм батырлык символы булган традицион тәкә бүләк иттеләр.

Искәртеп узабыз: якташыбыз Чаллы мәйданында инде икенче ел рәттән үзенең өстенлеген раслый. Узган 2025 елгы Сабантуйда да ул абсолют батыр калды. Ул чагында җиңүчегә «комфорт» комплектациясендәге 7 урынлык зур Soueast S07 кроссоверы һәм шулай ук тәкә тапшырылды. Югары нәтиҗәләрнең мондый тотрыклылыгы көрәшчебезнең какшамас ихтыяры һәм спортка тугрылыгы турында сөйли.

Чын чемпион һәм яшьләр өчен үрнәк

Азат Габдрәшитов — спорт дөньясында зур уңышларга ирешкән данлыклы шәхес. Ул:

• БРИКС уеннары җиңүчесе;

• Көрәш буенча дөнья чемпионы;

• Россия чемпионы;

• Милли көрәш буенча спорт мастеры.

Туган ягы горурлана!

Без, Актаныш халкы, якташыбыз Азат Габдрәшитовның бу олы уңышы белән чын күңелдән горурланабыз! Ул — районыбыз данын бөтен республикага, Россиягә һәм чит илләргә танытучы һәм яшь буын өчен чын үрнәк спортчыбыз.

Азатка ныклы сәламәтлек, җан тынычлыгы, яңадан-яңа биек үрләр һәм келәмнәрдә тик җиңүләр генә телибез! Сезнең уңышлар халкыбызның милли гореф-гадәтләрен саклауга һәм үстерүгә һәрвакыт зур этәргеч булсын!

Римма Мөхәммәтҗанова фотосы